A Vicerreitoría de Estudantes e Cultura da USC vén programando unha serie de actividades no marco do programa Faíscas culturais, formulado coa vontade de prender a reflexión cultural a través de proxectos artístico-pedagóxicos.
Desde o Seminario de Futuros Urbanos colaboramos con esta iniciativa nunha sesión vinculada á exposición Ficcións especulativas, acollendo un coloquio entre a artista Regina de Miguel e a comisaria Aránzazu Pérez Indaverea. De Miguel participa na exposición co filme Aguas intoxicadas, cometas nunca más vistos y una reunión de suicidas, no que imaxina a historia futura dunha muller que habita nun planeta lonxano onde o tempo se dilata entre a espera e a revelación. Ao ser a da artista unha traxectoria que vincula a arte ao cuestionamento dos dispositivos representacionais da ciencia e a imaxinación, programamos o coloquio Imaxinación xeográfica e especulación creativa para o deseño de futuros posibles, que terá lugar o xoves 30 de outubro ás 19:00 na Sala de Xuntas da Facultade de Xeografía e Historia.
