Imaxinación xeográfica e especulación creativa para o deseño de futuros posíbeis

Regina de Miguel é coñecida pola súa realización cinematográfica e práctica artística interdisciplinar, que combina a investigación e o desenvolvemento de procesos resultando na produción de coñecemento, películas e proxectos híbridos. Un dos principais fíos discursivos na súa obra é a análise crítica da suposta obxectividade dos dispositivos científicos de representación e as condicións de produción do coñecemento nese marco, así como as relacións entre violencia e extractivismo sobre corpos e territorios. As súas exposicións inclúen Canta una piedra (CAAC, Sevilla), Lapidario (Galería Maisterravalbuena, Madrid) ou But reality has no synonyms (con Lucrecia Dalt, SAVVY Contemporary, Berlin) e a súa filmografía foi exhibida en numerosos museos e institucións, como o MOCA (Los Ángeles), a Cinemateca de Bogotá ou a Art Sonje de Seúl.

Aránzazu Pérez Indaverea é comisaria da exposición Ficcións Especulativas. Doutora en Historia da Arte e Especialista Universitaria en Historia, Teoría e Método das Humanidades e Ciencias Sociais pola USC. As súas investigacións céntranse nas culturas dixitais, en especial, nas súas relacións co espazo e cos videoxogos. Desde 2006, participou en proxectos de investigación sobre paisaxe, arquitectura, patrimonio e espazos alternativos de creación. Realizou estadías en diferentes países, publicou artigos científicos e capítulos de libro e participou en congresos internacionais.